பெண்கள் கதைகள்

மதுபானப்பாட்டில்களைச்
சுற்றிய நண்பர்கள்
மெல்லிய வெளிச்சத்தில்
கொஞ்சம் கொஞ்சமாகப்
பருகத் தொடங்கினோம்
அறை முழுக்க. பரவியிருந்தது
மௌனம்..

பெண்கள் தான்
மோசமென வாந்தியெடுத்தார்
எதிரே
இருந்த நண்பர்களில் ஒருவர்

புற்றீசல்கள்
அலையத்தொடங்கின
பெண்கள் குறித்தான கதைகள்

காதலித்தப் பெண்கள்
ஏமாற்றியப் பெண்கள்
ஏமாந்த பெண்கள்
நல்ல காதல்
கள்ள காதல்
ரசித்தப்பெண்கள்

ஒவ்வொருவரிடமும்
நிரம்பி தளும்பியன
ஓராயிரக்கதைகள்

கண்களுக்குள் மிதக்கின்றன
கோப்பைகள்
மதுக்கோப்பைகள்
தீரத் தீர
நீளுகின்றன கண்ணீரும் சிரிப்பும்

விடிய விடிய
மதுக்கிணற்றில்
முழ்கியத்தருணத்திலும்
உதடுகள்
உதிர்க்கவே இல்லை
தன்
வீட்டுப் பெண்களின் பெயர்களை
                        சோலைமாயவன்